Цените на горивата и мазивата во Европската унија нагло пораснаа во март, за 12,9 проценти на годишно ниво, со особено силен скок на цените на дизелот за речиси 20 проценти, објави Евростат.
Највисок пораст на цените на горивата и мазивата е забележан во Германија, каде што цените скокнаа за 19,8 проценти, по што следат Романија за 19,6 проценти, Холандија за 18,8 проценти, Латвија за 18,5 проценти и Австрија за 17,2 проценти.
Спротивно на тоа, Унгарија и Словенија беа единствените членки на Европската унија кои забележаа годишно намалување на цените на горивата, од 2,7 проценти и 5,9 проценти, соодветно.
Во март, цените на дизелот во ЕУ беа за 19,8 проценти повисоки од претходната година, додека цените на бензинот се зголемија за 9,4 проценти.
На месечно ниво, во споредба со февруари, цената на дизелот во Европската Унија се зголемила во просек за 19,1 процент, додека цената на бензинот се зголемила за 10,6 проценти.
Највисок месечен скок на цените на дизелот е забележан во Чешка и Шведска, по 27,6 проценти, по што следуваат Естонија со 26,8 проценти, Латвија со 25,4 проценти, Белгија со 25,2 проценти и Холандија со 25,1 процент. Во случајот со бензинот, најголеми зголемувања на цените се регистрирани во Белгија, 15,1 процент, Шведска, 15 проценти, Австрија, 14,8 проценти, Чешка, 14,6 проценти, како и во Естонија и Литванија, по 14,2 проценти, според веб-страницата на Евростат.
