Американската централна банка, Федералните резерви (ФЕД), се очекува да ја зголеми каматната стапка на состанокот што се одржува на 15 и 16 септември, откако новите податоци покажаа дека инфлацијата останува повисока од очекуваното.
Според најновата анкета на Reuters, дури 85 отсто од анкетираните економисти очекуваат зголемување на референтната каматна стапка за 0,25 процентни поени. Тоа би ја довело во опсег од 3,75 до 4 отсто.
Очекувањата претставуваат голем пресврт во однос на минатата недела, кога поголемиот дел од економистите сметаа дека ФЕД ќе ги остави каматите непроменети.
Причината е новото забрзување на инфлациските притисоци, но и наглиот раст на цените на нафтата. Барелот „брент“ последните денови се движи над 100 долари, што дополнително ги зголемува стравувањата дека поскапата енергија повторно ќе ја забрза инфлацијата.
Пазарите веќе почнаа да очекуваат дека ФЕД би можел да продолжи со затегнување на монетарната политика и во следните месеци. Дел од економистите сметаат дека би можело да има најмалку уште едно зголемување до март 2027 година.
Одлуката на ФЕД ќе има големо влијание врз финансиските пазари, бидејќи повисоките каматни стапки го поскапуваат кредитирањето, го зголемуваат приносот на обврзниците и можат да влијаат врз инвестициите и потрошувачката.
