Американскиот претседател Доналд Трамп изјави дека САД во текот на изминатата ноќ транспортирале рекордно количество нафта низ Ормускиот теснец, нагласувајќи дека извезеното количество е поголемо од периодот пред избувнувањето на војната.
За време на обраќањето пред новинарите во Чикаго, Трамп порача дека се очекува брз пад на цените на нафтата на глобалниот пазар, но под јасно поставени услови.
„Цените на нафтата ќе паднат веднаш штом Иран ќе се откаже и штом ќе заврши војната, а тоа ќе се случи наскоро“, изјави американскиот претседател.
Овие изјави доаѓаат откако Трамп во саботата официјално го отфрли иранскиот мировен план, чија цел беше прекин на непријателствата и повторно отворање на стратешки важниот Ормуски теснец за меѓународниот поморски сообраќај.
Од друга страна, од Техеран пристигнуваат поделени пораки. Додека официјалната дипломатија истакнува дека преговорите и политичкиот дијалог остануваат единствено одржливо решение за конфликтот со САД и Израел, иранското воено раководство предупредува дека вооружените сили се целосно подготвени за одговор на какви било нови напади.
