Само еден ден по експлозијата на електроенергетската инфраструктура во близина на термоелектрана во источна Германија, нов инцидент е регистриран и на западот на земјата, во близина на Келн.
Полицијата потврди дека непознати лица предизвикале краток спој на високонапонски кабли на трафостаница, по што од електроенергетската мрежа испаднале неколку блокови на термоелектраната Бергхајм.
Инцидентот не предизвикал прекин на електричната енергија во домаќинствата, соопшти покраинското Министерство за енергетика.
Министерот за внатрешни работи на Северна Рајна-Вестфалија, Херберт Ројл, изјави дека според досегашните сознанија се истражува можноста зад нападот да стојат лица од странство или припадници на екстремно левичарски кругови.
„Врз основа на досегашните сознанија, поаѓаме од тоа дека се работи за напад зад кој стојат или сторители од странство или лица од екстремно левичарската сцена“, изјави Ројл.
Министерката за енергетика Мона Нојбаур го поврза денешниот случај со вчерашниот инцидент во источниот дел на Германија, кога експлозија оштети електроенергетски вод во близина на термоелектрана јужно од Берлин.
И во тој случај полицијата истражува дали станува збор за чин насочен против уставниот поредок на Германија.
Во последните месеци во Берлин и во западниот дел на земјата се регистрирани повеќе напади врз електроенергетската и железничката инфраструктура. Во дел од случаите одговорноста ја презеде левичарска екстремистичка мрежа.
Случаите се случуваат во период на зголемена безбедносна напнатост во Германија. Германските власти во последно време предупредуваат и на таканаречено хибридно дејствување, за кое Берлин смета дека во одредени случаи е поврзано со Русија.
Само ден претходно, германската влада ја обвини Москва за друг инцидент на аеродромот во Лајпциг и најави нови санкции кон Русија.
