Сојузот на синдикатите на Македонија преминува кон втората фаза од активностите за зголемување на платите. Блокадите почнуваат од 10 февруари со блокирање во македонското Собрание, а продолжуваат на 12 февруари со блокади пред Стопанската комора. Блокадата пред Владата е најавена за 17 февруари.
– Вчера истече рокот што илјадници работници им го дадоа на пратениците во Собранието да направат брзи измени на Законот за минималната плата, со кои таа ќе се зголеми на 600 евра, а другите ќе се зголемат за разликата од зголемувањето на минималната плата, односно најмалку за 6.000 денари. Игнорантскиот однос што го покажуваат пратениците кон работниците предизвика да преминеме на втората фаза од активностите што ги спроведуваме за зголемување на работничките плати – изјави денеска претседателот на ССМ, Слободан Трендафилов.
Утре, во 11 часот, ССМ ќе достави и иницијатива до Собранието за измени и дополнувања на Законот за платата и другите надоместоци на пратениците и на другите избрани и именувани лица.
– Со оваа иницијатива го менуваме членот со кој е утврдена основицата за пресметка на платите, така што наместо досегашната просечна плата како основица за пресметка по коефициент на сложеност, основица ќе биде минималната плата по коефициент на сложеност. На овој начин им даваме можност да покажат дека нема да овозможат дополнително зголемување на инфлацијата во Македонија и дека се подготвени да ги намалат своите плати за 40 проценти само со измена на оваа законска одредба, а дополнително да ги намалат и коефициентите за сложеност за 40 проценти – рече Трендафилов.
Доколку не го направат тоа, ССМ почнува иницијатива за собирање 10.000 потписи за да стане овластен предлагач на вакви законски измени.
Дваесет и четиричасовниот генерален штрајк останува опција, а не се исклучува можноста и за организирање уште еден протест како оној што се одржа минатата среда.
Во однос на тоа да се тргне делот за плати од Општиот колективен договор, од ССМ велат дека нема да дозволат работниците да се откажат од еднаш стекнато право загарантирано со Уставот и законот.
– Да се откаже работник од стекнато право гарантирано со Уставо и законот е спротивно на Законот за работните односи, кој јасно предвидува дека ниеден работник нема право да се откаже од право утврдено со законот или колективниот договор – рече Трендафилов.
