Администрацијата на американскиот претседател Доналд Трамп разгледува можност за ублажување на санкциите за бродовите од таканаречената „флота во сенка“, кои превезуваат нафта и нафтени деривати од земји како Русија, Иран и Венецуела. Целта е да се намалат рекордно високите трошоци за меѓународен поморски транспорт, изјавил неименуван американски претставник за Reuters.
Разговорите доаѓаат само неколку дена откако Трамп привремено ги укина санкциите за руското дизел-гориво, потег што го критикуваа украинскиот претседател Володимир Зеленски и некои европски земји.
Според американскиот претставник, новите разговори се однесуваат на можноста САД да дозволат превоз на нафта што не е под санкции со бродови кои претходно биле санкционирани. Тоа би опфатило сурова нафта и нафтени деривати за кои Вашингтон нема воведено забрани, за разлика од руската и иранската нафта, кои и понатаму се предмет на санкции.
Целта е да се овозможи поголем извоз на сурова нафта и нафтени деривати од регионот на Персискиот Залив. Американскиот министер за енергетика Крис Рајт оваа недела изјави преку видеопорака на Светскиот нафтен конгрес во Ријад дека администрацијата ја разгледува можноста за ублажување на санкциите за бродовите од „флотата во сенка“.
Според истражувачката група Energy Aspects, мерките би требало да помогнат во намалувањето на рекордно високите транспортни трошоци, кои негативно влијаеле врз побарувачката за американска сурова нафта.
Компаниите што сакаат да користат санкционирани бродови ќе мора да поднесат барање до американското Министерство за финансии, изјавил претставникот.
Американското Министерство за енергетика соопштило дека евентуалното ублажување на санкциите за „флотата во сенка“ нема да ѝ помогне на Русија во транспортот на нејзината нафта и нафтени деривати.
Сепак, настојувањето на Трамп руското дизел-гориво побрзо да стигне до светските пазари би можело да изврши притисок врз надлежните американски институции да дозволат користење на овие бродови.
Белата куќа засега не се огласила во врска со овие информации.
