Скопје е на рангирањето на европските градови и региони во иднината на fDi Intelligence, која е дел од реномираната групација Financial Times, на прво место во ТОП 10 средни европски градови според профитабилноста на инвестициите, објави Управата за технолошки и Индустриски развојни зони (ТИРЗ), јавува агенцијата МИА.
„Тоа е скок од четвртото место кое го имаше главниот град на Македонија на минатогодишното рангирање. Скопскиот регион годинава се најде и меѓу првите десет мали европски региони, односно „градови и региони на иднината“ по деловна клима и инвестиции“, се наведува во соопштението.
Списанието ги рангира европските градови и региони според нивната атрактивност, поволната деловна клима и можностите за странските инвеститори. Рангирањето е направено според перформансите во следните пет поткатегории: економски потенцијал, човечки капитал и начин на живот, поврзаност, поволно деловно опкружување и профитабилност. Оваа година, тим од експерти за fDI и Financial Times избра меѓу 330 градови и 41 регион.
„Повеќето странски инвеститори се лоцирани во технолошко индустриските зони во Скопје. Со нов пристап за привлекување инвестиции, ТИРЗ во последните три години оствари инвестиции од повеќе од една милијарда евра, што е еднакво на вкупниот обем на инвестиции од 2006 до 2019 година. Во 2023 година беше потпишан договор за најголемиот странски гринфилд инвестиција од осамостојувањето на земјата, тајванскиот гигант Јагео со договор вреден 205 милиони евра“, се додава во соопштението.
Од ТИРЗ посочуваат дека ефектот од странските инвестиции носи и директен бенефит за граѓаните. Просечната плата во зоните во октомври минатата година надмина 40.000 денари, што е двојно повеќе во однос на 19.000 во 2016 година, а бројот на работници се искачи на 18.000, што е трипати повеќе од 2016 година.
