Нападите на Израел врз 30 ирански складишта за гориво далеку ги надминаа очекувањата на САД кога Израел однапред ги извести за операцијата, предизвикувајќи го првото големо несогласување меѓу сојузниците од почетокот на војната, објавува Axios.
САД се загрижени дека израелските напади врз инфраструктурата што им служи на обичните Иранци би можеле да имаат стратешки спротивен ефект, обединувајќи го иранското општество околу поддршката за режимот и зголемувајќи ги цените на нафтата.
Нападите на израелските воздухопловни сили во саботата предизвикаа големи пожари во Техеран, со пламен видлив од километри, додека густ чад го покриваше главниот град.
Израелските одбранбени сили (ИДФ) соопштија дека складиштата за гориво „ги користи иранскиот режим за снабдување со гориво на разни потрошувачи, вклучувајќи ги и неговите воени структури“.
Израелски воен претставник изјави дека нападите делумно имале за цел да му кажат на Иран да престане да ја таргетира израелската цивилна инфраструктура.
Израелски и американски претставници изјавија дека ИДФ однапред ја известиле американската војска за нападите, но еден американски претставник изјави дека американската војска била изненадена од тоа колку широко биле опфатени.
„Не мислиме дека беше добра идеја“, изјави за „Аксиос“ висок американски функционер.
Иако погодените објекти не се постројки за производство на нафта, американските функционери стравуваат дека снимките од горење на складиштата би можеле да ги вознемират пазарите на нафта и дополнително да ги зголемат цените на енергијата.
„На претседателот не му се допаѓа овој напад. Тој сака да ја зачува нафтата. Не сака таа да гори. И тоа ги потсетува на луѓето на повисоките цени на горивата“, изјави за „Аксиос“ еден советник на Трамп.
Портпаролот на штабот на Иран, Хатам ал-Анбија, кој ги надгледува воените операции, предупреди во саботата дека Техеран би можел да одговори со слични напади низ целиот регион ако продолжат нападите врз нафтената инфраструктура на Иран.
Тој додаде дека Иран досега не ја таргетирал регионалната инфраструктура за гориво и енергија и се закани дека ако Иран го стори тоа, цената на нафтата би можела да достигне 200 долари за барел.
