Португалската компанија Alpac Capital презеде контрола врз повеќе медиуми во Србија, а мандатот го започна со смена на сите директори.
Alpac Capital е запишана како сопственик на телевизијата N1, Nova.rs, Radar, Danas, како и на телевизијата Nova. Првата одлука по преземањето на сопствеништвото била смена на директорите.
„По ред беа сменети Михаило Јовичевиќ, директор на порталот и весникот Nova, како и на неделникот Radar, потоа Александра Митиќ, директорка на компанијата Dan Graf, која е издавач на Danas, како и Брент Садлер од функцијата директор на Adria News, односно N1. Садлер беше сменет и од функцијата директор на Adria News Nova S, на која неодамна беше поставен. Во истиот пакет беше сменет и Јанез Живко, кој исто така беше директор на телевизијата Nova S“, објави Nova.rs.
По повод одлуката се огласи и телевизијата N1.
„По повод оваа вест напоменуваме дека процесот на преземање на Adria News Network (ANN) продолжува во согласност со претходно објавените планови, а промената на сопствеништвото нема да влијае врз уредувачката политика на ТВ N1, ниту врз начинот на кој редакцијата ги носи уредувачките одлуки. Редакцијата на N1 продолжува да работи според истите професионални принципи и стандарди како и досега. Уредничкиот тим ја задржува целосната одговорност за изборот на темите, начинот на известување и уредувачките одлуки во јавен интерес“, порачаа од телевизијата.
Медиумите во Србија претходно пишуваа дека групацијата зад која стојат Португалците Педро Варгас Давид и извршниот партнер Луис Сантос е поврзана со луѓе блиски до поранешниот премиер на Унгарија, Виктор Орбан, но и до Александар Вучиќ.
Дел од јавноста смета дека ваквата распределба на сопствеништвото би можела значително да ја зголеми концентрацијата на медиумската моќ во Србија и дополнително да влијае врз медиумскиот плурализам.
