Европската комисија денеска соопшти дека и натаму го поддржува мораториумот за отворање нови наоѓалишта на нафта и гас на Арктикот, и покрај противењето на Норвешка, еден од главните снабдувачи на Европа со енергенси.
Норвешка порача дека самата одлучува за експлоатацијата на своите природни ресурси, па владата во Осло го задржува сувереното право да одобрува нови бушотини на својот континентален појас, пренесува францускиот медиумски сервис BFM Business.
Норвешкиот министер за енергетика Терје Ослунд оцени дека без норвешките испораки енергетската ситуација во Европа би била значително потешка, истакнувајќи дека неговата земја е стабилен и сигурен снабдувач со нафта и гас, вклучително и со производството во Баренцовото Море.
Владата во Осло наведува дека се залага за нови бушотини и поради глобалните ризици за снабдувањето со енергенси од Блискиот Исток, каде што сообраќајот низ Ормускиот теснец во последните месеци е сериозно нарушен поради војната меѓу САД и Иран.
Норвешкиот континентален појас моментално обезбедува околу 30 отсто од гасот и 14 отсто од нафтата што ги трошат Европската Унија и Велика Британија.
Европската Унија нема директна правна можност да ѝ забрани на Норвешка нови бушотини, но може да користи посредни механизми, како построги климатски и еколошки стандарди за фосилните горива што се продаваат на европскиот пазар, намалување на потрошувачката на фосилни горива и условување на идните енергетски партнерства.
Норвешка не е членка на Европската Унија, иако е дел од Европскиот економски простор (ЕЕП) и применува голем дел од правилата на единствениот пазар.
Скандинавската земја истовремено се оддалечува и од претходно промовираната идеја да биде „зелена батерија на Европа“, благодарение на големите хидроенергетски капацитети и извозот на електрична енергија, објави претходно „Ројтерс“.
Ослунд кон крајот на август ја нарече таа идеја „погрешна“, бидејќи смета дека Норвешка сама не може да го стабилизира европскиот пазар на електрична енергија.
