Во Република Северна Македонија се регистрирани 173 мали семејни винарии. Eдна од нив е и винаријата Брзанов од Скопје каде што денеска во посета беа министерот за земјоделство шумарство и водостопанство, Љупчо Николовски и претседателот на Социјал-демократскиот сојуз на Македонија (СДСМ), Димитар Ковачевски.
При денешната посета на винаријата Брзанов, министерот Николовски истакна дека малите семејни винарии се успешна приказна на која сите треба да бидеме горди.
Тој посочи дека приказната за развојот на малите семејни винарии започнува во 2019, создавајќи законска можност за регистрација на физички лица како производители на вино.
– Нашите вредни лозари, кој со години за своја душа си произведуваат убаво домашно вино, на овој начин добија можност, да создадат мала семејна винарија со капацитет до 50.000 литри. Можност да своето вино, произведено од сопствено грозје, да го продаваат слободно и легално од куќен праг. Затоа креиравме посебна, нова, програма за поддршка на малите винарии. Програма со која преку грант поддршка до 10.000 евра ги поддржуваме малите винарии да набават опрема за производство, посочи Николовски.
Додаде дека преку транспарентна и законска постапка, од двата јавни повици, досега со грант поддршка за набавка на опрема поддржани се 145 мали винарии.
Ги повика пратениците да го донесат новиот закон за вино со кој, како што посочи, лозарите ќе имаат гарантирана откупна цена, но и нова посебна програма за финансиска поддршка.
Претседателот на Социјал-демократскиот сојуз Димитар Ковачевски истакна дека винарството е значајна земјоделска гранка, со сериозен удел во вкупниот извоз, но и во развојот на економијата.
– Ако од 2020 до 2024 се исплатени 560 милиони евра во директни плаќања, за периодот 2024 – 2028 година, вкупниот буџет ќе го зголемиме на 750 милиони евра. Оваа мерка покрај тоа што директно ќе ја подобри состојбата во земјоделството, ќе има ефект и на извозот. Со оваа очекуваме извозот од земјоделскиот сектор од сегашните 700 милиони да се зголеми на една милијарда и 250 милиони евра до 2028 година, рече Ковачевски, најавувајќи дека ќе се зголеми и Програмата за рурален развој за 20 проценти, со што буџетот за таа намена ќе биде над 100 милиони евра за периодот 2024-2028 година.
