Претседателот на САД, Доналд Трамп, изјави дека наредил воведување на царини од 25 проценти за земјите што соработуваат со Иран, a за секој бизнис што го склучуваат со Соединетите Американски Држави.
Тој истакна дека наредбата стапува на сила веднаш.
„Секоја земја што соработува со Исламската Република Иран веднаш ќе плати царина од 25 проценти за секој бизнис што го склучува со Соединетите Американски Држави“, рече Трамп во објава на неговата социјална мрежа Truth Social.
Портпаролката на Белата куќа, Каролин Ливит, изјави дека Трамп „покажал дека не се плаши да користи воени опции кога смета дека е потребно“, наведувајќи дека „никој не го знае тоа подобро од Иран“.
„Мислам дека едно нешто во што претседателот Трамп е многу добар е тоа што секогаш ги држи сите свои опции на маса, а воздушните напади би биле една од многуте, многу опции што се на маса“, рече Ливит, според Скај њуз.
Таа истакна дека за Трамп „дипломатијата е секогаш првата опција“.
Во јуни минатата година, САД нападнаа три ирански нуклеарни постројки, тврдејќи дека го спречуваат Иран да набави нуклеарно оружје.
Трамп неколку пати изјави дека САД би можеле да интервенираат во Иран, доколку властите во земјата ги убиваат учесниците во протестите, кои започнаа на 28 декември минатата година поради падот на вредноста на иранската валута и лошата економска состојба.
Според Групата за човекови права на Иран (IHRNGO) со седиште во Норвешка, најмалку 648 демонстранти се убиени во Иран од почетокот на протестите, додека илјадници се повредени.
