Министерката за финансии, Гордана Димитриеска Кочоска, не очекува негативни ефекти од царинската стапка на САД врз македонската економија и буџетот, ниту пак очекува некакви брзи негативни ефекти врз извозот, компаниите и отпуштање на работници.
Според министерката, трговската размена со САД е многу ниска и изнесува под 1% од целиот извоз и нема да се почувствува директно влијание.
„Директни ефекти нема да има. Не постои компанија која ќе го зголеми производството преку ноќ за да каже дека нема да увезува репроматеријали поскапи надвор од САД. Би прашала сега колку е основано ние дека ќе носиме ‘Најк’ патики кои се произведени во САД, бидејќи најголемиот дел од нив се произведуваат во други земји каде што има евтина работна снага“, рече Димитриеска Кочоска.
Кочоска Димитриеска не очекува ниту големи промени за македонската економија, преку ноќ, и индиректно преку Европската унија од царините кои ги наметна САД.
„Невозможно е преку ноќ да се случи нешто. Компаниите може да имаат намалено производство, но нема да ги отпуштат вработените на краток рок. Во меѓувреме европските држави ќе се договорат со САД. Во делот на преселба на капиталот нема да има реакција, бидејќи тоа е долг процес и нема да се случи дека ќе има отпуштање од работа затоа барам да не се крева паника во тој однос“, вели Димитриеска Кочоска.
Таа напоменува дека засега има проблем само една компанија која е директно зависна од извозот во САД, но рече дека владата се обидува да ѝ помогне на компанијата и таа компанија нема да отпушта работници.
Министерката за финансии смета дека САД направиле грешка со воведувањето царинска стапка за Македонија од 33 отсто и во однос на висината на царинската стапка од 65 отсто, бидејќи во земјава нема толку висока царинска стапка, освен за одделни земјоделски производи кои не се извезуваат на пазарот во САД.
„Царинските стапки се далеку пониски од 65 отсто. Министерството за надворешни работи веќе контактира со администрацијата на САД за да ја појасни состојбата“, рече Димитриеска Кочоска.
Таа информира и дека земјава планира да потпише договор за слободна трговија со САД, на што работи Министерството за надворешни работи. Притоа е планирано намалување или сведување на нула на царинските стапки.
„Ќе се види во текот на разговорите за какви царински стапки ќе се разговара, но и царинска стапка од 0% е прифатлива за нас бидејќи нашата трговска размена со САД е под 1% и нема никакво влијание на буџетот“, рече Димитриеска Кочоска.
