Ги поздравуваме сите иницијативи кои носат поголема одговорност и транспарентност во делот на енергетиката. Соопштението на Институтот за демократија во однос на тоа дека треба да бидеме крајно внимателни во делот на енергетиката е факт што бил запоставуван со години. Токму енергетиката е делот каде се направени најголемите криминали за што досега неколкупати алармирале и од Државниот завод за ревизија но без никаков успех.
Ова го соопштија од Министерството за енергетика, рударство и минерални суровини (МЕРМС), по повод документот за јавни политики на ИДСЦ, во којшто се посочува дека „зголеменото странско и домашно лобирање, конфликт на интереси и слаби човечки и материјални ресурси во новото Министерството за енергетика, рударство и минерални суровини, се дел од ризиците од корупција на кои новиот парламентарен состав би требало да посвети особено внимание“.
-Министерството е формирано за да се намали корупцијата, која порано токму поради непостоење на ваков тип на институција ја се носеа одлуки, постапки без закони туку со правилници и одлуки на владини седници за кои јавноста и многу малку знаеше. Оваа пракса мора да заврши, стои во реакцијата на Министерството.
Оттаму додаваат дека како Министерство ќе бидат крајно транспарентни во секоја постапка и оти со транспарентен однос, со јавна дебата за секое прашање и со постојано информирање на сите чинители во енергетиката може да се врати довербата во институциите.
-Како Министерство, иако ноформирано, покренавме постапка за итна ревизија на сите институции што се под наша надлежност и по спроведената постапка ќе побараме реакција од Обвинителството. Во моментов во фаза на ревидирање се постапките за јавни набавки во сите институции кои се спроведувале во време на техничката Влада. Поништен е тендер во МЕПСО од 900.000 евра каде компанијата што се пријавила и го добила нема капацитет ниту ресурси за спроведување на истиот, велат оттаму.
Потсетуваат дека направиле усогласување си Уредбата за гаранции на потекло со Енергетската заедница и истата е поставена на ЕНЕР каде е јавна и може да се коментира.
-Како држава сме на јавна критика од Енергетската заедница поради неносење на измените на Законите за енергетика и за обновливи извори на енергија. Формирана е работна група во рамките на Министерството каде учествуваат претставници на МЕПСО, ЕСМ, ЕВН, ЕБРД и Енергетската заедница и се работи на законските измени кои потоа ќе бидат преставени на јавноста и ставени на јавна дискусија. Ја повикуваме јавноста да ја следи нашата работа и на невладиниот сектор вратите на Министерството се отворени во секој момент. Очекуваме поддршка за нашата работа бидејќи во интерес на јавноста, во интерес на државата е драстично намалување на корупцијата во делот на енергетиката поради што е формирано ваков тип на Министерство, додаваат од МЕРМС.
