Лидерот на унгарската партија Тиса, Петер Маѓар, изјави дека идната влада ќе направи сè што може за да го диверзифицира купувањето енергетски производи, но дека нема целосно да се одвои од Русија во оваа смисла.
„Дури и ние не можеме да ја промениме географијата. Русија ќе остане тука, Унгарија ќе остане тука, ние ќе направиме сè за да се диверзифицираме, но тоа не значи дека ќе се отцепиме. Секогаш ќе набавуваме нафта што е можно поевтино и што е можно побезбедно“, рече Маѓар, еден ден откако партијата Тиса постигна убедлива победа на парламентарните избори, пренесува Indeks.hu.
Тој рече дека енергетската безбедност е една од најважните работи за Унгарија, но и дека диверзификацијата е најевтиниот начин за набавка на суровини.
Според него, нафтоводот „Дружба“ и ситуацијата во Иран покажуваат дека овие прашања го загрозуваат снабдувањето на Унгарија, поради што е во нејзин интерес да го диверзифицира снабдувањето со енергија.
Унгарецот изрази надеж дека војната нема да трае со години и дека Европската Унија ќе ги укине санкциите против Русија по завршувањето на војната, оценувајќи дека не е во интерес на Европа да купува суровини по повисоки цени бидејќи тоа би ѝ наштетило на конкурентноста.
„Никој нема да ги брани човековите права подобро од мене, но да не си пукаме во нога“, рече Унгарецот.
