„Макстил“ исплатила солидарен данок од безмалку 4,2 милиони евра, што е и највисокиот за оваа година. Фирмата оваа информација ја објави преку Македонската берза, во соопштение во кое додаваат дека годинава имаат значително пониска добивка од 2022 година.
„Добивката пред оданочување во извештајниот период е 69 милиони денари и е значително пониска од остварената во истиот период од 2022, додека нето добивката изнесува 56 милиони денари, значително пониска од остварената во истиот период во минатата година. Намалувањето на добивката во голема мера се должи на извршената задолжителна исплата на солидарниот данок во износ од 257 милиони денари (4 милиони и 17 илјади евра), којшто беше пресметан во септември 2023 и кој не произлегува од оперативното работење на компанијата. Дополнително, намалувањето на добивката во текот на овој пресметковен период во однос на остварената во текот на истиот период од минатата година се должи и на пониските продажни цени на готовиот производ. Во последниот квартал од годинава не се очекуваат позначајни промени во делот на продажните цени и трошоците за производство“, стои во соопштението на „Макстил“.
Оваа компанија лани имаше голем раст во добивката, што пак е и главниот услов за тоа кој ќе плати, а кој не солидарен данок.
