Македонската берза го објави новиот „Водич за трансформација и раст преку пазарот на капитал“, документ наменет да им помогне на домашните компании подобро да ги разберат можностите што ги нуди пазарот на капитал за обезбедување финансиски средства и поддршка на нивниот понатамошен развој.
Од Берзата посочуваат дека водичот е наменет пред сè за мали и средни претпријатија, но и за сите компании кои размислуваат за нови извори на финансирање преку издавање акции или обврзници, наместо исклучиво преку банкарски кредити.
Документот ги обработува клучните чекори за пристап до пазарот на капитал, предностите од котирањето на берза, како и искуствата и добрите практики кои можат да им помогнат на компаниите во процесот на трансформација и обезбедување дополнителен капитал за раст.
Од Македонската берза оценуваат дека развојот на домашниот пазар на капитал е важен предуслов за зголемување на конкурентноста на македонската економија, подобрување на корпоративното управување и отворање нови можности за инвеститорите и компаниите.
