Вработените во Лидл во Германија повторно добиваат бонус поради инфлацијата. Исплатата е поврзана со 50 годишнината на трговскиот ланец, а ќе ја добијат сите, скоро 100.000 вработени.
Информацијата ја пренесуваат германските медиуми, кои пишуваат дека вработените кои се вработени на неопределено време, а кои се подолго време во фирмата ќе добијат по 500 евра, додека пак поновите вработени ќе добијат плус 250 евра. Без бонус нема да останат ниту оние кои се вработени на определено. За нив, фирмата ќе одвои по 150 евра од човек.
Премијата истовремено е ослободена од плаќање данок и социјално осигурување, што го овозможуваат германските закони. Според пишувањата на локалните медиуми во Германија, оваа информација доаѓа од внатрешни канали на компанијата.
Лидл годинава прослави 50 години од постоењето во Германија. Приказната со ланецот на маркети почна во 1973 година во Лудвигсхафен, градот во Рајнска област-Пфалц, основан од Дитер Шварц, кој сега има 83 години.
Денес компанијата има над 3.200 филијали и 93.000 вработени само во Германија. Лидл освен во матичната држава, опстојува во 30 земји низ светот, а наскоро се очекува да почне со работа и во Македонија, бидејќи во 2021 година се основаше и македонската компанија.
