Куба целосно остана без дизел и нафта за греење, објави министерот за енергетика и рударство Висенте де ла О, предупредувајќи дека електроенергетскиот систем е во „критична состојба“.
Министерот изјави на државната телевизија дека во Хавана има сè почести и подолги прекини во снабдувањето со електрична енергија, при што некои населби остануваат без електрична енергија до 20 часа на ден. Кризата е дополнително продлабочена од недостигот на храна, гориво и лекови.
Според него, националната електроенергетска мрежа моментално работи исклучиво на домашна сурова нафта, природен гас и обновливи извори, но производството е ограничено поради недостаток на извори на енергија.
Во последните две години, Куба инсталирала околу 1.300 мегавати сончева енергија, но дел од капацитетот останува неискористен поради нестабилноста на мрежата и проблемите со снабдувањето со гориво, истакна министерот.
Тој додаде дека властите продолжуваат со преговорите за увоз на гориво, и покрај санкциите на САД и глобалниот пораст на цените на нафтата и транспортот, што дополнително го комплицира снабдувањето.
Министерот потсети дека по извршната наредба потпишана од американскиот претседател Доналд Трамп во јануари, со која беше најавено воведување царини за земјите што извезуваат гориво во Куба, испораките од традиционални извори како што се Мексико и Венецуела беа прекинати.
Оттогаш, според достапните податоци, само еден голем танкер под руско знаме испорача сурова нафта на островот.
