Американската компанија за достава UPS планира да отпушти 20.000 работни места и да затвори повеќе од 70 објекти низ целиот свет.
Мерките за намалување на трошоците следат по најавата на компанијата дека ќе го намали обемот на работење со „Амазон“, нејзиниот најголем клиент. Во првиот квартал од оваа година, UPS оствари профит од 1,2 милијарди долари.
UPS ќе го намали бројот на вработени за приближно 20.000 оваа година и ќе затвори 73 згради што ги изнајмува или поседува до крајот на јуни, објави компанијата, според француската агенција AFP, пренесува Seebiz.
Компанијата за достава моментално вработува околу 490.000 луѓе ширум светот. Овој потег беше направен за да се трансформира нивниот бизнис во променлива трговска средина.
„Макроекономската ситуација е неизвесна“, изјави извршната директорка на UPS, Керол Том.
Профитот на компанијата се зголеми за 7,2 проценти на 1,2 милијарди долари во првите три месеци од оваа година. Приходите се намалија за 0,7 проценти во однос на истиот период минатата година на 21,5 милијарди долари.
UPS објави во јануари дека ќе го преполови обемот на испораки за Amazon до втората половина на 2026 година.
Со оглед на моменталните макроекономски неизвесности, компанијата одлучи да не ја ажурира својата деловна прогноза за оваа година, пренесува АФП.
