Швајцарскиот производител на спортска опрема „Он“ (On), во кој удели имаат тениската легенда Роџер Федерер и фудбалската ѕвезда Килијан Мбапе, за првпат во својата историја оствари квартална продажба поголема од 900 милиони швајцарски франци.
Во третото тримесечје од годината, заклучно со септември, компанијата остварила приходи од 931,4 милиони франци, што претставува раст од 17,2 проценти во споредба со истиот период минатата година.
Нето-добивката пораснала за 36,9 проценти и достигнала 162,8 милиони франци, покажуваат финансиските резултати доставени до американската Комисија за хартии од вредност.
„Ова е повеќе од четирипати поголем квартал во споредба со периодот кога пред пет години излеговме на берзата“, изјавил претставник на раководството во разговор со аналитичарите.
Интернет-продажбата и сопствените продавници бележат најголем раст
Најголем раст компанијата забележала во продажбата преку сопствените продавници и интернет-страницата. Приходите од овој канал се зголемиле за 25 проценти, достигнувајќи 393,3 милиони франци.
Продажбата преку трговските партнери пораснала за 12,2 проценти, на 538,2 милиони франци.
За целата година, „Он“ и понатаму очекува раст на продажбата од нешто повеќе од 20 проценти, пресметано по постојани девизни курсеви.
И покрај рекордните резултати, инвеститорите реагирале претпазливо. Акциите на компанијата на 10 ноември, денот на објавувањето на финансискиот извештај, паднале за 7,5 проценти.
Федерер инвестираше во 2019 година, Мбапе се приклучи оваа година
Компанијата е основана во 2010 година во Цирих и стана позната на светскиот пазар првенствено по патиките за трчање.
Роџер Федерер инвестираше во компанијата во 2019 година, по долгогодишната соработка со американскиот производител „Најк“.
Во септември годинава, на компанијата ѝ се приклучи и Килијан Мбапе, кој по речиси две децении ја прекина соработката со „Најк“ и потпиша договор со „Он“.
Договорот вклучува финансиски надомест и сопственички удел во компанијата. Според пишувањето на „Атлетик“, „Најк“ понудил сличен основен финансиски надомест, но сопственичкиот удел бил пресуден за изборот на Мбапе.
Со ангажманот на францускиот фудбалер, „Он“ планира да влезе и на фудбалскиот пазар, на кој досега немала свои производи. Првите фудбалски копачки компанијата планира да ги претстави во 2027 година.
Проектот за развој на фудбалскиот сегмент го води поранешниот француски репрезентативец Тјери Анри.
