Кинеското Министерство за транспорт објави детален документ во кој се пропишани посебни пристанишни такси за бродовите во сопственост или управувани од американски компании, организации и поединци, како одговор на неодамнешните рестриктивни мерки на САД против кинескиот превоз.
Документот, кој содржи 10 члена, ги наведува обемот и стандардите на наплата, субјектите задолжени за наплата, видовите патувања што подлежат на таксите, како и датумот на спроведување и други технички детали, објави Синхуа.
Според соопштението, ослободувањата ќе важат за бродови изградени во Кина, празни бродови што влегуваат на поправки и други случаи што се сметаат за оправдани за ослободување од плаќање.
Министерството изјави дека износот и обемот на таксите ќе бидат динамички прилагодени во согласност со економските и политичките околности во времето на спроведување.
Мерките стапуваат на сила денес, откако САД воведоа дополнителни пристанишни такси за кинеските бродови како дел од истрагата на Законот за трговија, со која Вашингтон го обвинува Пекинг за „нефер практики“ во бродската индустрија.
Кинеското министерство оцени дека мерките на САД ги кршат правилата на Светската трговска организација (СТО) и договорот за поморски транспорт меѓу Кина и САД и дека тие претставуваат „сериозна штета“ на билатералната поморска трговија.
„Одлуката на Кина да воведе посебни пристанишни даноци за американските бродови е оправдана и неопходна мерка за заштита на легитимните интереси на кинеската индустрија и создавање фер конкурентска средина во меѓународниот превоз“, се вели во соопштението на Министерството.
