Интересот на странските купувачи за куќи и станови за одмор во Грција и годинава е на високо ниво, а меѓу земјите од кои доаѓа најголема побарувачка е и Србија. Според податоците од платформата за огласување недвижности Spitogatos, српските купувачи се на петтото место според интересот за имоти за одмор во Грција.
На прво место се купувачите од САД, пред Германија, Обединетото Кралство и Бугарија. По Србија следуваат Холандија и Швајцарија.
Најголемо внимание од странските купувачи привлекува Халкидики, особено поради близината до балканските пазари. Во тој дел од Грција, највисоки просечни барани цени има на Ситонија, каде квадратен метар годинава се нуди за околу 3.000 евра. На Касандра просечната цена е 2.895 евра за квадрат, додека во Неа Каликратија изнесува 2.513 евра.
Покрај Халкидики, странските купувачи покажуваат интерес и за Атина, предградијата на Солун и јужните предградија на Атика.
Значителен интерес постои и за имотите во близина на Атина. Во Сарони просечната барана цена достигнува 3.200 евра за квадратен метар, во Анавиос 2.941 евро, а во Порто Рафтери 2.667 евра. Токму Порто Рафтери бележи и едно од најголемите зголемувања на цените, од 14,7 проценти во однос на истиот период минатата година.
На островите во Саронскиот Залив, најскапи се Спецес, со просечна цена од 4.615 евра за квадратен метар, Порос со 3.207 евра и Егина со 2.692 евра. Кај Порос цените годинава се зголемиле за дури 20 проценти во споредба со минатата година.
Интерес има и за Пелопонез, каде меѓу бараните локации се издвојуваат Нафплио со просечна цена од 2.778 евра за квадратен метар, Каламата со 2.892 евра и Источна Мани со 2.727 евра.
Податоците покажуваат дека грчкиот пазар на недвижности и понатаму привлекува странски купувачи кои бараат имот за одмор, а Халкидики останува една од најбараните области, особено за купувачите од Балканот и Централна и Источна Европа. Интересот е зголемен и од Македонија, каде цените на квадратен метар во Скопје дури и во приградски населби станаа поскапи отколку во Грција покрај море.
