Италија нема да може да излезе од процедурата на ЕУ поради прекумерниот буџетски дефицит, откако италијанскиот завод за статистика ИСТАТ потврди дека дефицитот во 2025 година изнесувал 3,1 отсто од БДП, односно останал над клучната граница од три отсто.
Излегувањето од казнениот механизам би ѝ овозможило на Италија да ја искористи флексибилноста на правилата на Унијата и да активира таканаречен „исклучителен дефицит“ (extradeficit) од вкупно 36 милијарди евра во две години (14 милијарди за енергетика и 22 милијарди за одбрана), без тие средства да ги нарушат критериумите на Пактот за стабилност и раст на ЕУ, пренесува Sole 24 Ore.
Италија, сепак, остана во режимот на прекумерен дефицит, што значи дека секое дополнително задолжување целосно би се пресметувало во вкупниот долг и би го забавило излегувањето од процедурата на ЕУ.
Главен виновник за неуспехот дефицитот на Италија да се намали под три отсто повторно е контроверзната програма за даночни олеснувања за обновување на недвижностите.
И покрај тоа што стапката на субвенции е намалена од првичните 110 на 65 отсто, конечниот бран на барања и регистрираните измами во системот го зголемија трошокот на оваа програма во 2025 година на 8,1 милијарда евра, што е четири пати повеќе од првичните проценки.
Владата во Рим затоа сега мора да почека до следната година, кога ќе биде извршена ревизија врз основа на показателите за 2026 година. За оваа година се проценува дефицит од 2,7 до 2,8 отсто од БДП.
