Претседателот на Русија, Владимир Путин, денеска на бизнис-форумот на БРИКС во Њу Делхи изјави дека современиот свет минува низ длабоки промени и дека се појавуваат нови двигатели на глобалниот развој.
Путин рече дека земјите од БРИКС во последните пет години произвеле повеќе од 40 отсто од светскиот бруто-домашен производ (БДП), истакнувајќи дека земјите членки имаат огромни и динамични внатрешни пазари, со забрзана урбанизација.
„Ако зборуваме за растот на глобалната економија во истиот период, тогаш речиси половина од тој раст го обезбедија земјите од нашиот сојуз“, рече Путин, пренесува РИА Новости.
Рускиот претседател оцени дека западните конкуренти се обидуваат да ја вратат поранешната лидерска позиција во светската економија. Како што оцени, Западот во обидот да го задржи економското лидерство прибегнува и кон директно уништување објекти и гасоводи.
„За жал, вашите западни конкуренти во моментов се обидуваат со сите средства да го вратат своето поранешно лидерство. Оваа конкуренција сега добива грди форми, како што токму спомена нашиот ирански колега. Покрај тоа, тие грди форми се користат на државно ниво, дури и со употреба на директна физичка сила или уништување индустриски и логистички објекти, цевководи и така натаму“, рече Путин.
Според неговите зборови, на Русија ѝ биле воведени повеќе од 30.000 санкции, што, како што наведе, е двојно повеќе од бројот на санкциите воведени против сите земји во светот заедно.
Тој додаде дека земјите кои вовеле санкции кон Русија и самите се соочиле со економски пад.
„Во услови на строги надворешни ограничувања, можно е да се постават амбициозни цели и успешно да се остварат. Јасно е дека земјите кои ги иницираа санкциите, а кои се соочуваат со целосниот товар на буџетските дефицити, растечкиот јавен долг и индустрискиот пад, не успеваат да спроведат такви политики. Тие се соочуваат со тешки и сериозни последици“, рече Путин.
Според него, индустриското производство во водечките економии на еврозоната во последните неколку години паднало за осум отсто.
„Водечките економии на еврозоната – нема да покажувам со прст, но падот на индустриското производство од осум отсто во последните неколку години е значителен пад за нив… Русија го зајакнува својот економски суверенитет“, рече Путин во својот говор на пленарната седница на Бизнис советот на БРИКС.
Рускиот лидер нагласи дека БРИКС создава нова одржлива платформа за глобален раст, чии правила не се наметнати однадвор.
„Со заеднички напори на владините институции, компаниите и стручните кругови, БРИКС создава нова, одржлива платформа за глобален раст. Клучно е нејзините главни елементи, правилата што ја регулираат работата на компаниите и организациите, да не бидат наметнати однадвор, односно да не ни ги наметнува таканаречената златна милијарда“, рече Путин.
Тој истакна дека Русија е „подготвена да соработува со целиот свет, вклучително и со Западот“ и дека е подготвена да придонесе за енергетската и прехранбената безбедност во светот.
Путин денеска ја започна тридневната посета на Индија, во рамки на која ќе учествува на 18. самит на БРИКС на 12 и 13 септември и ќе одржи неколку билатерални средби, меѓу другото со претседателот на Јужна Африка, премиерите на Малезија и Етиопија, престолонаследникот на Абу Даби и шефот на Новата развојна банка на БРИКС.
