Европската централна банка (ЕЦБ) денеска ја зголеми клучната каматна стапка за 0,25 процентни поени, на 2,5 отсто, во обид да го ограничи растот на инфлацијата поттикнат од високите цени на енергенсите поради војната во Иран.
Ова е второ зголемување на каматите од страна на ЕЦБ годинава. Банката соопшти дека инфлацијата во еврозоната минатиот месец надминала три отсто, значително над среднорочната цел од два отсто.
Растот на цените на нафтата и природниот гас, предизвикан од нарушувањата во снабдувањето и неизвесноста околу транспортот на енергенси преку Ормутскиот Теснец, создава дополнителен инфлаторен притисок врз економијата.
ЕЦБ сега очекува просечната инфлација во еврозоната да изнесува три отсто во 2026 година, а 2,5 отсто во 2027 година. Истовремено, прогнозата за економскиот раст е благо подобрена, па банката сега очекува раст од 0,9 отсто во 2026 година, наспроти претходно проектираните 0,8 отсто.
Претседателката на ЕЦБ, Кристин Лагард, предупреди дека изгледите за инфлацијата остануваат многу неизвесни и дека конфликтот на Блискиот Исток продолжува да создава инфлаторни притисоци.
Одлуките за натамошно зголемување или намалување на каматите, според ЕЦБ, ќе се носат зависно од новите економски податоци. Пазарите, сепак, веќе очекуваат можност за дополнителни зголемувања на каматите доколку високите цени на енергенсите продолжат да ја поттикнуваат инфлацијата.
