Познатиот производител на чоколади Ritter Sport мора да покрие дел од амбалажата на веќе произведените чоколади поради новите правила на Европската Унија за спречување на таканареченото „зелено перење“.
Станува збор за натписот „100% сертифицирано одржливо потекло на какаото“, тврдење што компанијата со години го користи во своето рекламирање.
Причината е европската директива позната како EmpCo – „Зајакнување на потрошувачите за зелената транзиција“. Според новите правила, изрази како „еколошки прифатливо“ и „одржливо“ ќе може да се користат само доколку се поткрепени со конкретни и проверливи информации.
Од компанијата велат дека веќе е во тек повторното подготвување на амбалажата, но процесот не може да се заврши за само неколку месеци. Портпаролот не можел да прецизира колку пакувања ќе мора повторно да бидат етикетирани.
На новата амбалажа на предната страна ќе стои тврдењето „без додадени ароми“, додека на задната страна ќе биде наведено дека и понатаму се користи 100 отсто сертифицирано какао, заедно со релевантните информации.
„За нас беше важно да не уништиме ниту една фолија“, соопштија од компанијата.
Ritter Sport наведува дека во принцип ги поддржува мерките на ЕУ кои имаат цел да обезбедат поголема транспарентност и јасни информации за потрошувачите, поткрепени со проверливи докази.
Сепак, компанијата предупредува дека различното толкување и применување на новите правила во европските земји создава правна неизвесност и претставува дополнителен предизвик.
