Белгија останува против користењето на замрзнатите руски средства за финансирање на помошта за Украина, изјави белгискиот министер за надворешни работи Максим Прево.
Неговата изјава следува откако група земји членки на Европската Унија побара повторно да се разгледа можноста за користење на руските пари за поддршка на Украина, објави Ројтерс.
Холандија, Полска, Шпанија и Шведска минатата недела повикаа ЕУ да ја разгледа оваа можност, а неколку министри повторно ја поддржаа идејата на неформалниот состанок на шефовите на дипломатиите на ЕУ во Ирска.
„Дебатата повторно беше покрената на иницијатива на четири европски земји, но кај колегите предизвика малку ентузијазам и подготвеност“, изјави Прево по разговорите.
Тој нагласи дека ставот на Белгија по ова прашање е непроменет веќе една година.
„Причините поради кои се спротивставуваме на тоа не исчезнаа како со магија“, рече белгискиот министер.
Прево предупреди дека користењето на руските пари преку постапка која би претставувала конфискација би донело „многу значителни ризици“.
Белгија е особено загрижена за можните правни и финансиски последици, додека дел од членките на ЕУ се обидуваат да најдат начин замрзнатите средства да ги искористат за поддршка на Украина.
