Германската автомобилска индустрија се соочува со егзистенцијална криза што може да ја чини земјата вкупно 225.000 работни места до 2035 година, предупреди Здружението на автомобилската индустрија (VDA).
Според најновите анализи, очекуваниот пад на вработеноста е подрастичен од првично предвидениот, а главните причини се губењето на конкурентноста на Германија како деловна локација и ригидната регулатива на Европската Унија.
Претходните студии на VDA предвидоа нето загуба од околу 190.000 работни места помеѓу 2019 и 2035 година, со оглед на тоа што производството на електрични возила е помалку сложено од она на моторите со внатрешно согорување, но реалноста е уште полоша.
Од 2019 година, веќе се изгубени околу 100.000 работни места, а до 2035 година се очекува тој број да порасне на вкупно 225.000. Ова значи дека ризикот сега е за 35.000 работни места поголем отколку во проценките од пред само две години.
„Германија повеќе не создава доволно нови работни места бидејќи домашните деловни услови станаа неконкурентни на меѓународно ниво“, се наведува во извештајот на VDA.
Работните места што следат по дигиталната и зелената трансформација сè повеќе се отвораат во странство, а не во Германија. Суштината на проблемот лежи во регулативата на Европската унија за емисиите на јаглерод, која од 2035 година практично дозволува само регистрација на нови електрични возила и оние што работат на водород, тврди VDA во извештај на својата веб-страница. Претседателката на VDA, Хилдегард Милер, предупредува дека високите даноци, скапата енергија, високите трошоци за работна сила и прекумерната бирократија ги принудиле компаниите да насочуваат инвестиции надвор од Европа.
„Егзодусот на инвестиции и вработувања нема да помине без последици за просперитетот на нашата земја, како и за нејзината социјална и политичка стабилност“, рече Милер.
