Претседателката на Европската комисија Урсула фон дер Лајен во саботата изјави дека европските компании потпишуваат договори во вредност од повеќе од 40 милијарди евра со египетски компании, кои опфаќаат широк опсег на индустрии.
Фон дер Лејен зборуваше на инвестициската конференција ЕУ-Египет во Каиро, каде што разговараше и со египетскиот претседател Абдел-Фатах ел-Сиси.
„На оваа конференција европските компании потпишуваат повеќе од 20 нови договори или меморандуми за разбирање со египетските партнери, кои се во вредност од над 40 милијарди евра. Имаме компании во секторите од водород до управување со водите, од градежништво до хемикалии, од превоз до авијација и автомобилската индустрија“, рече таа.
Фон дер Лајен, исто така, ги пофали инвестициите во зелената енергија и дигиталната обука, истакнувајќи ја „амбициозната цел на Египет да стане центар за чиста енергија“.
Дводневната конференција е дел од стратешкото и сеопфатно партнерство меѓу Египет и ЕУ договорено од фон дер Лајен и ел-Сиси во март.
Договорот ги опфаќа политичките односи, економската стабилност, инвестициите и трговијата, како и прашањата за миграцијата и безбедноста.
