Европската комисија признава дека професионалните возачи од Западен Балкан се соочуваат со проблеми поради ограничувањата за престој во Шенген-зоната, но засега нема да има промена на правилата.
Портпаролот на Европската комисија, Маркус Ламерт, изјави дека институцијата е свесна за тешкотиите со кои се соочуваат одредени категории, меѓу кои и професионалните возачи на камиони, при влезот и излезот од земјите членки на Шенген.
Сепак, според него, новиот Систем за влез и излез (EES) не воведува нови правила, туку само автоматски го следи веќе постоечкото ограничување на престојот.
„Остануваме отворени за разговор за тоа што може да се направи во рамките на нашите правила, но мора да биде јасно дека шенгенските правила и понатаму ќе се применуваат“, порача Ламерт.
Тој додаде дека со слични проблеми се соочуваат и други професии, меѓу кои уметници и спортисти.
Превозниците од Босна и Херцеговина, Србија, Црна Гора и Северна Македонија веќе неколку месеци бараат промена на правилата, со образложение дека ограничувањето на престојот им го отежнува нормалното извршување на работата во Европската Унија.
Во јануари тие блокираа дел од граничните премини кон ЕУ, а неодамна одржаа протести и во главните градови на своите земји.
Превозниците предупредија дека доколку нивните барања не бидат исполнети, повторно би можеле да ги блокираат граничните премини кон Европската Унија.
