Извршниот директор на американската технолошка компанија Nvidia, Џенсен Хуанг, испрати писмо до вработените во кое презеде одговорност за своите постапки, им се извини на семејството и колегите и најави целосна соработка со независната истрага што ја покрена управниот одбор на компанијата.
Во писмото, чија содржина ја објави The Washington Post, Хуанг отворено призна дека бил неверен кон сопругата и дека со своите постапки ги повредил неа и нивните деца.
„Не постои оправдување за она што го направив. Длабоко жалам“, навел Хуанг, преземајќи целосна одговорност за последиците од своето однесување.
Тој истакнал дека семејството со години му давало љубов и поддршка, но дека не возвратил со искреноста и лојалноста што ги заслужувале. Додал дека се надева оти со текот на времето повторно ќе ја стекне нивната доверба.
Посебна порака упатил и до вработените, членовите на управниот одбор, деловните партнери и акционерите, признавајќи дека не ги исполнил нивните очекувања.
„Водењето на Nvidia е најголемата привилегија во мојот живот. Мојата одговорност е да бидам достоен за вашата доверба. Во тоа потфрлив. Посветен сум на компанијата и ќе работам повторно да ја заслужам вашата доверба“, напишал тој.
Истрага поради сомнежи за кинеско разузнавачко влијание
Случајот добива дополнителна тежина поради извештаите на американските медиуми за наводна блиска врска на Хуанг со кинеска деловна жена, која американските разузнавачки служби ја поврзувале со пренесување информации до Пекинг.
Според извештаите, станува збор за поранешна висока функционерка на сингапурската компанија Megaspeed, која е деловен партнер и купувач на напредните чипови на Nvidia.
Управниот одбор на Nvidia во неделата соопшти дека започнал независна истрага за наводите дека Хуанг можеби бил цел на странска разузнавачка операција. Истрагата ќе ја надгледуваат независни членови на одборот, со помош на надворешни правни советници.
Од компанијата наведуваат дека засега немаат причина да веруваат дека се загрозени американската национална безбедност или деловните тајни на Nvidia, но дека ќе ги разгледаат сите достапни информации.
Хуанг најавил дека целосно ќе соработува со истрагата и повторно ја истакнал својата посветеност на компанијата и заштитата на американската национална безбедност.
Во завршницата на писмото, тој побарал неговото семејство да биде поштедено од јавниот притисок, нагласувајќи дека членовите на семејството немаат никаква одговорност за неговите постапки.
„Моето семејство не сноси никаква одговорност за моите избори. Јас сносував одговорност. Ве молам, почитувајте ја нивната приватност“, порачал Хуанг.
Според соопштението на Nvidia, Хуанг ќе продолжи да ја извршува функцијата извршен директор без прекин додека трае истрагата.
