Полнењето на државната каса се одвива подобро од планираното. Извршувањето на буџетот оди според очекувањата. Собрани се повеќе приходи во март и април споредено со првите два месеци од годинава. Министерката за финансии, Гордана Димитриеска- Кочоска, вели дека треба да се почекаат финалните извештаи, но дека се прават напори да се анализира поврзаноста на компаниите, да се зголеми присилната наплата, да се наплатат дивидендите и во крајна мера, вкупно да се зголемат даночните приходи. Министерката уверува дека особено добри биле финансиските резултати за тековниот месец април.
Институциите успеале да реализираат 73 милиони евра или 10% од вкупно предвидените годишни капитални инвестиции до 8 април годинава. Министерката Димитриеска-Кочоска вели дека климатските услови биле неповолни за одвивање на веќе започнатите инфраструктурни проекти, но и и на оние кои допрва треба да почнат со реализација.
Димитриеска Кочоска ветува дека граѓаните повеќе нема да имаат вештачка слика за реализацијата на капиталните проекти. Како завршени повеќе нема да се евидентираат платени аванси и гаранции, бидејќи тоа не било градење и обнова, туку вештачко прикажување дека се сработило повеќе од реалното.
Министерката е задоволна од полнењето на државната каса по основ на царини. Во врска со проблемот со наметнатите поголеми царински стапки од страна на САД и нивното стопирање во период од 90 дена, Димитриеска – Кочоска вели дека тоа е шанса за Македонија директно да извезува таму. 10% царини е нешто што е прифатливо за најголем дел од државите. Следната недела Министерката ќе оди на редовните пролетни средби со Светска Банка и ММФ во Вашинтон, каде ќе ја искористи приликата да преговара со челниците за олеснување на трговската размена.
