Кина повторно ги помести границите кога станува збор за инфраструктурни мегапроекти. Нова железничка станица „Чонгкинг Исток“ е изградена во градот Чонгкинг, и која веќе се смета за најголема во светот.
Оваа огромна сообраќајна точка зафаќа дури 1,22 милиони квадратни метри, што е многу пати повеќе од познатите светски станици како „Гранд Централ“ во Њујорк или „Лајпциг Хауптбанхоф“ во Германија.
За полесно споредување, станицата зафаќа површина поголема од повеќе од 170 фудбалски игралишта и е двојно поголема од Ватикан.
Објектот има осум нивоа и поврзува брзи возови, метро линии, автобуси, такси, како и приватен паркинг. Покрај тоа, во комплексот има продавници, ресторани и други објекти.
Станицата има 15 перони и 29 железнички линии, вклучувајќи брзи возови кои достигнуваат брзина од 350 километри на час.
За разлика од класичните станици што се користат за градски превоз, оваа е дизајнирана да поврзува големи градови и региони, што бара значително подолги состави и поголеми капацитети.
Изградбата на оваа станица не е изолиран проект, туку дел од поширока стратегија за развој на инфраструктурата во Кина, пишува theB1M.
Денес, оваа земја има најголема мрежа на брзи железници во светот, која се протега на повеќе од 50.000 километри. За споредба, Шпанија, која е втора во светот, има помеѓу 3.000 и 4.000 километри.
Кинеските инвестиции во инфраструктурата траат со децении и имаат неколку цели – поврзување на помалку развиените делови од земјата, поттикнување на трговијата и економскиот раст, но и зајакнување на глобалното влијание.
Чонгкинг, каде што се наоѓа оваа станица, е еден од најбрзо растечките градови во Кина. Денес, неговото урбано население е околу 10 милиони, што е четири пати повеќе отколку пред три децении.
Изградбата на толку комплексна зграда барала огромни количини на материјали – користени се околу два милиони кубни метри бетон и повеќе од 360.000 тони челик.
Интересно е што во процесот на градење биле користени и роботи, кои помогнале во израмнувањето на теренот, поставувањето стаклени фасади, заварувањето и други прецизни работи.
Според достапните податоци, употребата на автоматизација значително ја забрзала работата, ги намалила трошоците и ја зголемила безбедноста на градилиштето.
Иако Кина импресионира со брзината и обемот на изградбата, се поставува прашањето колку се одржливи ваквите проекти на долг рок.
Големите инфраструктурни објекти бараат високи трошоци за одржување, а некои аналитичари предупредуваат дека економските приноси не секогаш ги следат инвестициите, особено во помалку развиените региони.
Од друга страна, кинеските власти нагласуваат дека целта на овие проекти е долгорочен развој, поврзување на земјата и намалување на регионалните разлики.
