„Volkswagen“, „Mercedes-Benz“, „BMW“ и „Porsche“ во вториот квартал забележаа значителен пад на продажбата во Кина, најголемиот автомобилски пазар во светот, бидејќи слабата побарувачка и сè посилната домашна конкуренција дополнително вршат притисок врз секторот.
Податоците на компаниите покажуваат дека продажбата на овие германски производители во периодот од април до јуни се намалила за меѓу 30 и 41 процент во споредба со истиот период лани.
Во првата половина од годината сите компании пријавиле пад поголем од 20 проценти на кинескиот пазар, што ја намалило нивната вкупна профитабилност, а во одредени случаи го неутрализирало растот остварен на другите пазари.
Автомобилскиот аналитичар Леи Синг оцени дека станува збор за едни од најголемите квартални падови што германските производители досега ги забележале во Кина. Групацијата „Volkswagen“, на пример, во тој период испорачала 424.300 возила, што претставува пад од 36,6 проценти, а тоа придонело и за намалување на нејзината глобална продажба за 8,6 проценти, и покрај растот на испораките во Европа и Америка.
Компанијата со седиште во Волфсбург најави дека, по последниот пад на продажбата, ќе преполови дел од својата понуда на модели. Во меѓувреме, „Porsche“ ги оцени условите на кинескиот пазар како предизвикувачки, додека „Mercedes-Benz“ соопшти дека Кина се соочува со значително послаб пазар и неповолно макроекономско опкружување.
На падот на продажбата влијаат долготрајната криза во кинескиот сектор за недвижности, забавувањето на економијата и намалената доверба кај потрошувачите, поради што купувачите сè почесто се откажуваат од поголеми трошоци.
Дополнителен притисок создава и повеќегодишната ценовна војна на домашниот пазар, каде што сè повеќе купувачи се одлучуваат за подостапни кинески брендови, како што е „BYD“.
Експертите посочуваат дека германските автомобилски групации и понатаму се значително посилни во производството на возила со мотори со внатрешно согорување отколку кај електричните автомобили. Во исто време, продажбата на електрични возила во Кина расте побрзо од продажбата на класичните модели, додека кинеските производители многу побрзо ја обновуваат својата понуда, што им обезбедува дополнителна предност во сè поострата пазарна конкуренција.
