Германската автомобилска индустрија, некогаш симбол на стабилност и добро платени сигурни работни места, поминува низ еден од најтешките периоди во својата историја.
Според податоците на Блумберг, речиси 100.000 работни места би можеле да исчезнат до крајот на деценијата, а најголемиот удар ќе го донесат производителите кои до вчера се сметаа за носители на растот.
Бош е најновиот пример. Компанијата позната по алати и апарати за домаќинство е исто така еден од најголемите светски добавувачи на автомобилската индустрија, но сега објави затворање на дури 13.000 работни места во својот оддел за мобилност. Ова го носи вкупниот број на планирани отпуштања во Бош на 18.500 до 2030 година, што ја става веднаш зад Фолксваген. Кај најголемиот германски производител, 35.000 работни места се во прашање, откако минатата година беше објавено гаснење на повеќе од 30.000 работни места.
И други гиганти се на удар. Добавувачите „ЗФ“ и „Континентал“ предвидуваат намалување од 14.000 односно 10.150 вработени. „Ауди“ исто така затвора 7.500 работни места, додека „Шефлер“ планира да отпушти 4.700 луѓе. Ниту „Порше“ ниту „Форд“ не се имуни, првиот ќе отпушти 1.900 вработени, а вториот илјада.
Главните причини за ваквите намалувања се електрификацијата, зголемувањето на трошоците за развој, глобалната конкуренција и политичките неизвесности. Особено, се издвојуваат американските царини и слабата продажба на електрични автомобили што не ги следат очекувањата. Германската влада дополнително ја комплицира ситуацијата со неизвесни сигнали за идните регулативи.
Марсел Фрачер, директор на Германскиот институт за економски истражувања (DIW), смета дека ова не е краткорочна турбуленција.
„Најавата за големи отпуштања во Бош е само почеток на сериозно индустриско реструктуирање во Германија. Ќе видиме уште многу отпуштања и банкроти во наредните години“, рече тој.
