Вработените во „Старбакс“ го проширија штрајкот во уште четири американски градови, вклучително и Њујорк, објави денеска синдикатот кој претставува повеќе од 10.000 вработени во таа компанија.
На почетокот на штрајкот, кој започна во петокот, кафулињата на Старбакс во Лос Анџелес, Чикаго и Сиетл беа затворени, а сега штрајкот се прошири и во Њу Џерси, Њујорк, Филаделфија и Сент Луис, објави Ројтерс.
Преговорите меѓу синџирот кафетерии и синдикатот дојдоа во ќорсокак поради нерешените прашања за платите, персоналот и распоредот, што доведе до штрајк, кој започна пред божиќните и новогодишните празници.
Синдикатот Workers United организираше штрајк во десет градови во Соединетите Американски Држави, вклучувајќи ги Колумбус, Денвер и Питсбург.
Синдикатот предупреди дека штрајкот би можел да опфати стотици кафулиња на Старбакс до вторник, на католичката и протестантската вечер на Божиќ.
Компанијата Старбакс во САД има повеќе од 11.000 кафулиња и вработува околу 200.000 работници.
