Хрватска требаше да добие целосно автономен автомобил и нов систем за превоз без возач, но проектот на компанијата на Мате Римац не ги исполни поставените цели. Компанијата досега примила 89,74 милиони евра европски средства, а сега следува конечна евалуација која ќе утврди колкав дел од парите ќе биде признат како оправдан.
Проектот, првично познат како Project 3 Mobility, а денес како Verne, требаше да развие целосно автономно електрично возило од петто ниво, специјализирана инфраструктура и софтверска платформа за управување со целиот систем.
Рокот за завршување истекува денес, 31 август 2026 година, откако претходно беше продолжен за пет месеци.
Од хрватското Министерство за море, транспорт и инфраструктура потврдиле дека не е поднесено ново барање за продолжување на рокот. По неговото истекување, компанијата има еден месец да достави извештај за реализираните активности, трошоците и конечните резултати, по што надлежните институции ќе извршат евалуација.
Според досегашната реализација, клучната цел не е исполнета – не е развиено возило од петто ниво на автономија, ниту пак таква услуга се нуди на хрватските сообраќајници.
Во меѓувреме, Verne започна да нуди превоз со своите возила преку апликацијата Uber во Загреб, но возилото не може самостојно да се нарача, а услугата се активира само доколку возилото е достапно. Во него мора да има возач-оператор.
Во прашање се милиони евра од европските фондови
За проектот биле одобрени 179,5 милиони евра европски средства, што беше најголемиот поединечен износ доделен на приватна компанија преку хрватскиот Национален план за закрепнување и отпорност.
Според податоците наведени во извештаите, Project 3 Mobility досега примила 89,74 милиони евра.
Од таа сума, досега се оправдани трошоци од само 8,8 милиони евра преку одобрени барања за надомест, односно околу 10 отсто од примените средства.
Затоа конечната евалуација ќе биде клучна за утврдување на износот што компанијата ќе може да го задржи како оправдан трошок. Доколку не се оправда значителен дел од досега исплатените средства, компанијата би можела да биде обврзана да врати поголем дел од парите.
Вкупната вредност на проектот првично била проценета на околу 535 милиони евра.
Проектот предвидуваше целосно автономно електрично возило, инфраструктура интегрирана со јавниот градски превоз и софтверска платформа за управување со целиот систем. Досега, ниту една од трите клучни компоненти не е целосно реализирана.
