Пилот и петчлено на семејство од Шпанија, од кои три деца, загинаа кога туристички хеликоптер се урна во реката Хадсон во Њујорк во четвртокот, изјави градоначалникот на Њујорк, Ерик Адамс.
Туристичкиот хеликоптер полетал во 14 часот и 59 минути по локално време, а потоа изгубил контрола и со роторот свртен надолу паднал во реката во близина на Долен Менхетен и околу 15:15 часот по локално време потонал, соопштија властите.
Според инормациите кои пристигнуваат од местото на несреќата, станува збор за извршниот директор на Сименс Шпанија, Аугустин Ескобар, неговата сопруга и трите деца.
Њујоршката полиција и пожарникарите ги извлекоа телата на жртвите. За четири од нив е констатирана смрт на местото на несреќата, а две жртви се пренесени во локалните болници каде им подлегнале на повредите.
Сојузната управа за авијација (FAA) изјави дека хеликоптерот бил од марката „Bell 206“. Управата и Националниот одбор за безбедност на сообраќајот ќе спроведат истрага, која ќе ја води Националниот одбор.
Портпаролот на полицијата во Њујорк изјави дека полициски чамци помогнале во обидот за спасување во реката Хадсон.
На видеото од несреќата се гледаат неколку спасувачки и полициски чамци кои кружат по делот од реката каде што потона хеликоптерот.
