Венко Филипче од вчера вечер и официјално е избран за претседател на Социјалдемократскиот сојуз на Македонија (СДСМ) на непосредни внатрепартиски избори, на кои тој беше единствениот кандидат.
Претседателот на Централната изборна комисија Бранко Георгиевски рече дека од 23.712 запишани избирачи, вкупно гласале 18.140 односно 76,5 проценти од активно регистрираните членови.
Според резултатите од гласањето кои ги објави партијата, за Филипче гласале 18.001 избирачи, додека неважечки ливчиња имало вкупно 139.
„Ова не е само моја победа. Ова е заедничка победа. Ова е победа на сите членови на СДСМ коишто искрено веруваат во вредностите на социјалдемократијата, во правичноста, во напредокот, во еднаквоста. Имаме тешка задача пред нас. Сега во следниот период почнува сериозната подготовка за локалните избори и процесот ќе го правиме така како што го најавивме и како што веќе го започнавме. Ќе ги избереме луѓето кои најдобро ќе не претстават на локалните избори, луѓето кои ќе имаат кредибилитет да излезат во своите средини, пред своите соседи, пред своите пријатели и познаници во своите општини. Луѓе на кои ќе може да им се верува дека политиките и програмите коишто ќе ги ветат, ќе можат да ги исполнат“, изјави старо-новиот претседател на СДСМ по објавувањето на победата и потврдувањето на лидерското место на најголемата опозициска партија.
