Германската компанија Бош објави дека ќе укине 1.100 работни места до крајот на 2029 година во својата фабрика во германскиот град Ројтлинген и ќе го префрли фокусот на производството на локацијата од застарени контролни единици на модерни полупроводници за електрични возила.
Компанијата се пожали на голем пад на побарувачката и силен ценовен притисок во секторот за автомобилска електроника, што се главните причини за најавеното реструктуирање, објавува Тагешау.
„Мораме брзо да се прилагодиме на промените на пазарот и да ја обезбедиме долгорочната конкурентност на локацијата“, рече извршниот директор на Бош, Дирк Крес.
Според него, конкуренцијата на пазарот се зголемува, а сегашната организација на фабриката во Ројтлинген повеќе не е одржлива.
Во споменатата фабрика, каде што моментално работат околу 10.000 луѓе, во иднина ќе се произведуваат силициум карбидни чипови, клучна компонента за поголема ефикасност и досег на електрични возила.
До крајот на 2023 година, „Бош“ има укинато повеќе од 14.000 работни места низ целиот свет, претежно во Германија. Само минатата година, бројот на вработени во Германија се намали за 4.400, што претставува пад од 3,3 проценти.
