Владата и Министерството за енергетика немаат влијание врз работата на Регулаторната комисија за енергетика затоа што е таа е независно тело, но ќе иницираме предлог за обезбедување државен универзален снабдувач со струја, истакна министерката за енергетика Сања Божиновска, одговарајќи на прашањето од пратеникот Амар Мециновиќ дали ЕСМ, како производител на електрична енергија, може да биде избран за универзален снабдувач.
-Работата на Регулаторната комисија е независна и тука никој нема никакво влијание, но можам да направам состанок и работна група и да утврдиме што е најдобро за граѓаните. Знаете дека ЕСМ се труди да го зачува стандардот и да нема поскапување на електричната енергија. Денеска ја очекувам прес-конференцијата и се надевам дека нема за следната година да има повеќе од еден – два проценти зголемување на сметките. Тоа го работи ЕСМ, дава електрична енергија на ЕВН, а што се однесува за универзалниот снабдувач знаете дека за Регулаторот, директно, тука и од вас се бираат членовите. Значи, ние немаме никаква ингеренција, не би ни сакала никогаш да се мешам во работата, меѓутоа можеме да седнеме и да поразговараме за сѐ што тие треба да го донесат, но тоа вие тука го гласате. Ние како Влада може само да предложиме нешто, меѓутоа на крај тука вие ги гласате сите работи што се однесува за Регулаторната. Ќе иницирам, откако ќе се заврши објавување на цените од 1 јануари, ако сакате можеме и вас да ве повикаме и секој е добредојден, може да ја разговараме и ќе ве известиме, истакна министерката Божиновска.
Претходно пратеникот Мециновиќ во образложението истакна дека странскиот приватен бизнис во енергетскиот сектор остварува висока добивка, што во 2023 година имала раст од 129 проценти. Нагласи дека во буџетот за 2025 година се предвидени 1,3 милиони евра за гасификација и нема политичка волја за изградба на хидроцентралата Чебрен за која не се предвидени средства, а ја праша министерката што се прави за обезбедување енергетска независност на државата.
– Кога дојдов имаше шест стратешки инвестиции и сите ги повлеков од Собранието затоа што тие не беа за бенефит на нашите граѓани. Имаше 50 милиони евра што му се подаруваат на странски инвеститор, се даваа долгорочни откупни цени и сите беа повлечени. Што се однесува за гасификацијата, кога дојдов после девет месеци имаше тендер за гас конекторот со Република Грција, тој тендер беше прекинат, не знаеме зошто. Направивме сѐ за нов тендер и цената е за 12 милиони евра поевтина од претходниот пат. Имаме четири милијарди денари доспеани побарувања и за тие долгови 50 проценти се за набавка на јаглен. Во тек е ревизија на работењето и се утврдени многу неправилности и имаше полициска инспекција. За адитив има 6,5 милиони евра, јас бев „Осломеј“, лично го видов, има 12 тона набавен адитив од којшто ниедно литро не е искористено. Нема да остане само на овие 6,5 милиони, ќе има истрага и за јагленот. ЕСМ се најде во многу тешка состојба, после седум години имаме минус од 80 милиони евра, рече Божиновска, посочувајќи дека долговите на ЕСМ од 2 милијарди евра ќе бидат намалени на 1,6 милијарди евра.
Наведе и дека денеска е потпишан Договор за грант од ЕБОР за изградба на 30 мегавати во Битола и Осломеј и оти се разгледуават можностите за проектот Чебрен. Работна група што ја формирала со сите професори кои учествувале во изградбата на Козјак досега имала два состанока. – Ги разгледуваме сите можни студии за Чебрен, што значи тоа ќе биде подолг процес, иако е осум години некој период, се надеваме дека барем ќе започнеме со нешто што ќе биде бенефит за нашите граѓани, истакна министерката Божиновска.
