Коалициските партнери во белгиската Федерална влада рано изутринава постигнаа договор за Буџетот на Белгија за 2026 година, соопшти денеска на прес-конференција белгискиот премиер Барт де Вевер.
– Ми олесна. Многу сум задоволен што мојот тим не избра одолговлекување на напорите за постигнување договор, изјави Де Вевер.
Белгискиот крал Филип на почетокот на месецов и даде рок на Владата за постигнување договор за Буџетот до Божиќ на 25 декември. Де Вевер тогаш најави дека ако до поставениот рок не биде постигнат договор, тој ќе поднесе оставка.
Со денеска усогласениот буџетски план, според Де Вевер, Владата ќе заштеди 9,2 милијарди евра до 2030 година, во рамки на напорите за усогласување со правилата на ЕУ за висината на трошоците.
– Ни требаше шок за да ги средиме финансиите на земјата и го направивме тоа. Ја спасив социјалната држава од пропаст, вистина, со преземање непопуларни мерки, но имам висока плата и мислам дека денеска ја заслужив, рече Де Вевер.
Со договорот се предвидува индексацијата да не важи за месечните нето плати над 4.000 евра во 2026 и 2028 година, со што, според Де Вевер, се предвидува државата да заштеди 883 милиони евра, а бизнисите околу 800 милиони евра. Индексацијата претставува постапка со која секоја година платите се зголемуваат за одреден процент зависно од растот на трошоците за живот и стапката на инфлација.
Дополнително, стапката на ДДВ од сегашните шест се зголемува на 12 отсто, меѓу другото, и за природниот гас, хотелски престој, за достава на храна и спортски и рекреативни услуги. За возрат, ДДВ-то за електричната енергија се намалува од 12 на 6 проценти, а за безалкохолните пијалаци од 21 на 12 отсто.
Договорот предвидува и зголемување на минималната плата преку намалување на придонесите за социјално осигурување, како и намалување на данокот на личен доход од 2028 година.
Белгија со буџетскиот план за 2026 година ќе воведе и давачка од две евра за малите пратки што влегуваат во земјата од држави што не се членки на Европската Унија, како што се нарачките од платформите за онлајн трговија, како „Тему“, „Шејн“ или „АлиБаба“.
