Македонската компанија за дојдовен туризам Балкан Прајм Турс започнува амбициозна промотивна кампања на азискиот пазар, со цел да ја претстави Македонија и регионот на балканот како атрактивна туристичка дестинација.
Компанијата со сопствен штанд ќе учествува на престижниот саем ITB Asia 2025 во Сингапур, кој претставува водечки азиски туристички саем, а кој оваа година се одржува од 15 до 17 октомври 2025. На ITB Asia учествуваат илјадници излагачи од целиот свет, туристички дестинации, хотели, авиокомпании, тур-оператори кои се среќаваат со најважните азиски купувачи од областа на туристичките патувања, и претставува централно место за умрежување и склучување бизниси.
Балкан Прајм Турс паралелно организира и roadshow, патувачки презентации во Јужна Кина и Хонг Конг.
Промоцијата во Азија има стратешка важност за раст на туризмот во Македонија и регионот. Азија има милиони потенцијални туристи, патници со огромната куповна моќ и потенцијал, кои за разлика од традиционалните европски гости кои главно патуваат во текот на летната сезона, патуваат и во периоди надвор од сезоната (на пример, Кинеската Нова Година во јануари/февруари е период кога милиони Кинези патуваат во странство – токму среде нашата зима).
За регионот и земјава тоа значи шанса да имаме гости и приходи и во периодите кога домашните туристички капацитети инаку би мирувале. Хотелите, рестораните во земјава би работеле со повисок интензитет и во зимските месеци, што ја подобрува нивната профитабилност и одржливост, а со тоа се создаваат целогодишни работни места во туризмот, наместо сезонска вработеност.
За Балкан Прајм Турс, присуството на ваков настан со сопствен штанд е значаен инвестициски потфат и логистички предизвик – но и нужна инвестиција во иднината. Девизата „без промоција нема туризам“ се покажува особено точна во денешниот свет на дигитални медиуми и information overflow. Ако сакаме далечните туристи да дознаат за убавините на Балканот, мора проактивно да се претставиме пред нив. Настапот на ITB Asia ни овозможува директно да ја промовираме Македонија и Балканот пред стотици тур-оператори и агенции од Кина, Индија, Југоисточна Азија, Јапонија, Австралија и многу други пазари на едно место.
Колку и да е убава една дестинација, ако никој не знае за неа, таа останува само скриено богатство, а не туристички производ. Тоа е посебно истакнато денес во ера на дигитализација, ефтини летови и лесна достапност на која било дестинација. Азија е можеби значајно оддалечена од Македонија и балканот, но овде живее огромна популација, меѓу кои и луѓе кои се во потрага по автентични и оригинални туристички доживувања, а тоа го имаме ние на балканот.
Станува збор за промоција иницирана од приватниот сектор, која секако би била поефикасна ако постои синергија со државните институции. Координиран настап, поддржан и од државата, би значел подобро брендирање на дестинацијата – нешто кон што треба да се тежнее во иднина.
“Туристите од Азија се во потрага по нови и уникатни искуства. Балканот за нив претставува егзотична и неоткриена дестинација, богата со историја, култура и традиција. Македонија, како дел од поранешна Југославија, им звучи интересно и егзотично. Уште во 2016 година, кинески тур-оператори оценија дека Македонија има огромен потенцијал за кинескиот пазар, особено благодарение на нашите природни езера, културно-историски споменици (цркви, тврдини), како и винскиот и гастрономскиот туризам. Токму ваквите автентични содржини – прошетки низ историски места, дегустација на локална храна и вина, средби со локални занаетчии се она што азиските гости го ценат и бараат за разлика од стандардните „луксузни“ понуди. Нашиот регион може да им понуди нешто што го немаат дома, а тоа е формулата за задоволување на современиот светски турист” изјави Генерален менаџер на Balkan Prime Tours.
