Вкупните консолидирани продажби на Алкалоид АД Скопје за 2023 година достигнаа 268,3 милиони евра, што е за 16% повеќе во споредба со истиот период лани. Консолидираната продажба на домашниот пазар е зголемена за 13%, а вкупниот консолидиран извоз на компанијата е зголемен за 17%. Од вкупните консолидирани продажби, 31% се остварени во Северна Македонија, додека, пак, 69% се остварени на странски пазари.
Гледајќи ги регионите, 29% се реализирани во земјите од Југоисточна Европа, 22% се реализирани во земјите од Западна Европа (ЕУ и ЕФТА), 17% се остварени во земјите од Источна Европа (ЗНД, УКР..) и на други пазари 1 % од вкупните консолидирани продажби. Најголем пораст на главните извозни пазари во однос на минатата година е забележан во продажбата во Канада, која е зголемена за 62 пати; потоа во Италија, каде што пораснале 35 пати; во Јужна Африка 5 пати; во Чиле повеќе од 4 пати, како и во Чешка и Велика Британија, каде што пораснале повеќе од два пати. Потоа следат оние во Монголија (раст од 87%), во Ерменија (раст од 69%), Романија (раст од 66%), Албанија (раст од 33%), Украина (раст од 26%), во Бугарија (раст на 15 %) итн.
Гледано по групи производи, во структурата на вкупната консолидирана продажба најголемо учество имаат производите од фармацевтскиот сегмент, поточно 90%, додека сегментот хемија, козметика и лековити растенија учествуваат со 10%. Од фармацевтските производи, поголемо учество во вкупната продажба имаат антибиотиците со 27%, препаратите преку шалтер со 19%, невролошките препарати со 12%, кардиолошките препарати со 12% од вкупната консолидирана продажба итн. Вкупните инвестиции во основни средства во 2023 година изнесуваат 28,3 милиони евра, а во однос на остварените во 2022 година бележат пораст од 18%.
Ваквото зголемување на инвестицијата се должи на најголемиот инвестициски проект на АЛКАЛОИД во последните 20 години – новиот производствен оддел за производство на цврсти форми 2 – кој повеќе од двојно го зголемува капацитетот за производство на цврсти форми. Консолидираната добивка пред финансиски расходи, даноци и амортизација (EBITDA) достигна 44,7 милиони евра и бележи пораст од 8%, додека консолидираната нето добивка во износ од 25,6 милиони евра исто така е зголемена за 8%. Групацијата АЛКАЛОИД има 2.843 вработени, од кои 2.155 се во Северна Македонија, а 688 од нив се вработени во здружени компании надвор од државата.
Цената на акцијата на АЛКАЛОИД АД Скопје на официјалниот пазар на Македонската берза во 2023 година се движеше од 280 до 300 евра или во просек 290 евра по акција. На ден 31.12.2023 г. пазарната капитализација на компанијата беше повеќе од 422,5 милиони евра. Одборот на директори на АЛКАЛОИД АД Скопје го усвои Предлогот за одлука со која му предлага на Собранието на акционери исплата на дивиденда за 2023 година во износ од 8,78 евра бруто или 7,90 евра нето по акција, што во однос на исплатената дивиденда по акција за претходните години со 7,97 евра бруто или 7,17 евра нето е за 10,2% повисоко. За исплата на дивиденда и персонализиран персонален данок, компанијата ќе издвои околу 12,6 милиони евра.
