Активирани се банкарски гаранции вредни вкупно 39 401 550 денари поради незаконско постапување при инвестирањето во фотоволтаици. Се работи за компаниите ЕМК ДООЕЛ – Мали хидроелектрани – Скопје, Пуцкопетрол, СБН ЕНЕРГИ увоз-извоз ДОО Кичево и Сол груп 5 ДОО Скопје, обелодени денеска министерката за енергетика Сања Божиновска.
Како што истакна Божиновска на брифинг со новинарите, првпат се случува да бидат активирани банкарски гаранции.
-Правната служба заклучи дека овие фирми немаат исполнето дел од обврските според Договорот, поради што се пристапи кон одземање на парите и банкарските гаранции се наплатени, рече министерката.
Во врска со новите енергетски капацитети, Божиновска информира дека е пристигната една иницијатива за изградба на когенеративна гасна централа од 495 MW. Се уште не се знае за која локација е барањето зашто документацијата е преобемна и се уште се проверува дали е комплетна, како и дали ги исполнува дефинираните критериуми.
-Многу е важно документацијата да биде во ред и дали инвеститорот има искуство, дали знае да ја изгради когенеративната централа, истакна Божиновска.
До Министерството за енергетика се пристигнати и иницијативи за ветропаркови 1.590 MW, за интегриран storage за ветер 402 MW (1.080 MWh), за фотонапонски електрани 5.052 MW, за интегриран storage за PV 1.174 MW (3.018 MWh), за гасна централа со мотори 21 MW, за самостојни складишта 2.596 MW (3.094 MWh) и за експериментални објекти 288 MW.
-Имаме барања за нови енергетски капацитети со моќност од 7 100 мегавати (ветер, сонце и гас), како и барања за околу 4 172 мегавати интегрирани батерии што е одлично. Има интерес, но за мене е побитно дали поднесените документи се во ред. Со новиот Закон првпат има годишен план за изградба на нови енергетски капацитети, ќе се гради она што е приоритет за државата и граѓаните. Први октомври беше рокот за странските инвеститори што сакаат да градат, да достават документација. На веб страната се достапни сите документи што се бараат. Добивме оргомен број документи, потребно е време да се обработат, напомена Божиновска.
Информира и дека меѓународната компанија „Англо Американ“, една од водечките светски корпорации во областа на рударството и металургијата, има поднесено пет иницијативи за детални геолошки истражувања, но од 2019 година нема добиено никаков одговор.
-Иницијативите многу време стоеле во фиока, не добиле ни позитивен, ни негативен одговор. Сега тоа се процесуира, треба да се изјаснат сите институции, па потоа ќе видиме, нагласи министерката.
