Годишната стапка на инфлација во Грција падна во октомври од септемвриските 2,7 на 2,4 отсто и сега е најниска во последните четири месеци, објави грчкиот статистички институт ЕЛСТАТ.
Во октомври цените на храната и безалкохолните пијалоци во Грција се зголемени за 1,5 отсто на годишно ниво, алкохолните пијалоци и тутунот за 1,2 отсто, домувањето и комуналните услуги за 3 отсто, здравството за 3,6 отсто и образованието за 2,8 отсто, но кај сите во наведените категории, растот на цените е побавен во однос на септември.
Наспроти ова, облеката и обувките во октомври пораснале за пет отсто, услугите во рестораните и хотелите за 6,1 отсто, рекреацијата и културата за 1,5 отсто, а во областа на комуникациите за 1,3 отсто, што во сите случаи претставува побрз годишен раст на цената во однос на претходниот месец.
На месечна основа, цените во Грција пораснаа за 0,6 отсто во однос на септември, забавувајќи се во однос на растот од 1,8 отсто во претходниот месец.
