Од денеска стапува на сила нова обврска за сите големи трговци на мало, со вработени 10 и повеќе луѓе, јавно да ги објавуваат цените на производите што ги нудат.
Оваа мерка се однесува на сите супермаркети, аптеки, продавници за бела техника и мебел, како и продавници за градежни материјали. Надлежните велат дека доколку дојде до ненамерна грешка при објавувањето на цените, продавачите ќе имаат можност да ја поправат во рок од 24 часа без последици по компанијата или раководното лице.
Стопанската комора со прехранбени производи на големо и мало бара од Министерството за економија продолжување на рокот за креирање веб-страници за правните лица кои подлежат на обврската. Велат дел од малите трговци сè уште се во процес на адаптација, од технички, финансиски и кадровски аспект, потенцираат дека постои реална потреба од дополнително време за квалитативна и одржлива реализација поради сложеноста и обемот на проблематиката.
За наредната недела е закажан работен состанок помеѓу претставници од Министерството за економија и Стопанската комора со прехранбени производи на големо и мало, за разговори и надминување на состојбата со решение задоволително за сите страни.
