Европа би можела да се соочи со проблеми со снабдувањето со гориво и губење на работни места доколку регулаторите не го одобрат договорот на групацијата „Гунвор“ за преземање на меѓународните средства на „Лукоил“ во вредност од околу 22 милијарди долари.
Извршниот директор и мнозински сопственик Торбјорн Торнквист вели дека шведската групација „Гунвор“ со седиште во Женева треба да ги преземе средствата на „Лукоил“ во Србија, Бугарија и Романија, мрежите на бензински пумпи во Европа и САД, како и нафтените и гасните полиња на Блискиот Исток, Централна Азија и Африка.
Реализацијата на овој договор зависи од одобрувањето на американските, британските и швајцарските институции, а времето е ограничено бидејќи новите американски санкции против „Лукоил“ и „Роснефт“ стапуваат во сила на 21 ноември, пишува SEEbiz.
Торнквист предупреди во интервју за „Фајненшл тајмс“ дека е клучно да се продолжат лиценците за работа за „Лукоил“, бидејќи во спротивно „капацитетот на рафинериите би можел сериозно да биде загрозен“.
Рафинеријата Лукоил во Бургас обезбедува повеќе од две третини од горивото во Бугарија, додека Петротел во Романија покрива околу една третина од рафинирањето на нафта во таа земја. Според него, секое прекинување на работата директно би влијаело на енергетската стабилност на регионот.
Во исто време, шведскиот милијардер Торнквист ги отфрли шпекулациите дека Гунвор само привремено го презема имотот за Лукоил подоцна да го врати, посочувајќи дека властите ќе бараат „целосно прекинување на сопственичките врски“ со руската компанија.
Историските врски на групацијата Гунвор со Русија дополнително ја комплицираат оваа трансакција. Еден од коосновачите на компанијата беше сојузник на рускиот претседател Владимир Путин, Генадиј Тимченко, кој го продаде својот удел на Торнквист откако беше опфатен со санкции во 2014 година.
Гунвор постепено се повлече од повеќето руски проекти, но сè уште постои ризик за репутацијата, според Фајненшл тајмс.
Соединетите Американски Држави минатиот месец ги ставија Лукоил и Роснефт на списокот на санкционирани субјекти, како дел од напорите за намалување на руските приходи за време на војната во Украина.
Затоа, одобрението од Канцеларијата за контрола на странски средства (OFAC) при Министерството за финансии на САД е потребно за финализирање на трансакцијата.
