Владата чека одговор од Европската комисија и од Европската енергетска заедница за таксата која од денеска Бугарија ја наплаќа за рускиот природен гас, кажа премиерот Димитар Ковачевски.
„Реагиравме со министерот Крешник Бектеши во Европската комисија дека ова е такса која не треба да биде воведена со оглед на тоа дека целокупниот капацитет на влезната страна на гас е даден од страна на Бугарија на Гаспром. Тоа значи дека ваква такса кај нас ќе предизвика зголемување на цената на електричната енергија и на затоплување за 20%. И затоа побаравме капацитетите да се ослободат за да може Македонија да набави гас од други извори гас кој нема да биде руски гас и нема да биде оптеретен со оваа такса. Се водат преговори за да може ова да биде направено. Ние лани успеавме да договориме ослободување на капацитетот за да донесеме азербејџански гас, се надевам дека ќе се договориме и сега со Бугарија“ рече Ковачевски.
Македонија годишно троши околу 450 милиони метри кубни природен гас. Со природен гас се произведува и парното во Скопје, но од Регулаторна комисија потенцираа дека нема да има ново промена на цената во случај да не се најде позитивно решение во однос на таксата која ја наметна Бугарија за дистрибуција на природен гас.
Минатата недела министерот за економија, Крешник Бектеши кажа дека ќе бара отштета од Бугарија и дополнителна поддршка од Европската Унија откога Бугарија воведе такса за природниот гас што се испорачува преку нејзина територија.
